असमञ्जस 'म'

कल्पनाको अमूर्त रजतपटमा

पोतेर सपनाका सुनौला रङगहरू

म जीजिविषाको त्राण खोजिरहेछु

आकांक्षामा उकेराको प्राण रोजिरहेछु

रङ्गका यी अजस्र केस्राहरूमा

जिन्दगानीको कृत्रिम सार रचिरहेछु

खोज्दैछु तर नदेखिने आकृतिहरू

गिज्याउँदै छन् मेरो सामर्थ्यलाई, र

दृश्य-अदृश्यको लुकामारी हेरिरहेछु

लत्रेका रङसंगै ,कुचिका कसिंगरहरू

अमूर्तताको शून्य आकृति लेखिरेहछु,

यो मिसावटबाट-रङ्गको रङ्गसंग

खै कुन र कस्तो आकृति रोजिरहेछु ?

ध्यानस्थ मेरो मानसपटमा

अभीप्सा औ जुगुप्सका ज्वारहरूबीच

निर्लिप्त नभेटिने क्षितिज खोजिरहेछु

अपनत्वका श्वरहरूको आगमलाई

रोकेर, सान्त्वना निर्वाण रचिरहेछु

तिमी भनौला, यो रचनागर्भ

आत्मवञ्चनाको परिहास हो,

स्वयं र आफ्नाहरूको भीडमा

आफ्नै छायाको पदचाप छल्दै

अनवरत म गतिमान दौडिरहेछु

स्वयं आँफैबाट छल्दै , छलिँदै

अमूर्त सपनाका आकारहरू खोज्न

म एक तमासको अर्थहीन दौड कुदिरहेछु ।

-कृष्ण पौडेल